"Vüqar Həşimov Memorialı-2022" beynəlxalq turnirin daha iki iştirakçısı bəlli olub

"Vüqar Həşimov Memorialı-2022" VIII beynəlxalq şahmat turnirinin daha iki iştirakçısı açıqlanıb.

"Report"un məlumatına görə, 17 - 24 dekabrda keçiriləcək yarışda hindistanlı Qukeş Dommaracu və yerli şahmatçı Aydın Süleymanlı da mübarizə aparacaqlar.

2012-ci ildə məktəblilər arasında Asiya, 2018-ci ildə isə 12 yaşadək şahmatçılar arasında dünya çempionu olan ​Dommaracu 12 yaşında qrosmeyster tituluna yiyələnib. Hindistan təmsilçisi tarixdə ikinci ən gənc qrosmeyster adına sahib olan şahmatçıdır. O, 2022-ci ildə Hindistanın Çennai şəhərində keçirilən 44-cü Ümumdünya Şahmat Olimpiadasında birinci lövhədə qızıl medal qazanıb. ​

Yeniyetmələr arasında dünya və ikiqat Avropa çempionu, “Aeroflot Open 2020” turnirinin qalibi olan Aydın Süleymanlı 2021-ci ildə “Vüqar Həşimov” klubunun heyətində klublararası Avropa Kubokunda bürünc medala sahib çıxıb. Qrosmeyster 2019-cu ildə milli komandanın heyətində Türkiyənın Çorum şəhərində 16 yaşadək şahmatçılar arasında Ümumdünya Şahmat Olimpiadasının qalibi olub

Daha əvvəl turnirə Şəhriyar Məmmədyarov və Rumıniya təmsilçisi Riçard Rapportun qatılacağı dəqiqləşib. On şahmatçının iştirakı ilə keçiriləcək yarış rapid və blits üzrə təşkil olunacaq.

Turnir Vüqar Həşimov Şahmat Fondunun təşkilatçılığı, Gənclər və İdman Nazirliyinin və Azərbaycan Şahmat Federasiyasının dəstəyi, SOCAR-ın sponsorluğu ilə “Fairmont Baku” hotelində baş tutacaq. Vüqar Həşimov memorialı ilk dəfə 2014-cü ildə Şəmkirdə keçirilib.