“Baku Fire” həkimin AFFA tərəfindən 5 oyunluq cəzalandırılmasına münasibət bildirib

Azərbaycanın Yüksək Liqasında çıxış edən “Baku Fire” XI turda “Araz-Naxçıvan”la baş tutan görüşdən sonra klubun həkimi Cəlal Əliyevin AFFA İntizam Komitəsi tərəfindən 5 oyunluq cəzalandırılmasına münasibət bildirib.

Bu barədə “QELEBE.AZ”a komandanın kapitanı və məşqçisi Elvin Quliyev açıqlama verib.

O, həkimin hakimə sayılmayan qola görə etiraz etdiyini söyləyib:

“Epizodların birində vurduğumuz qol sayılmadı. Həkim də buna etiraz etdi və qolu saymamasının səbəbini soruşdu. Bundan sonra qırmızı vərəqə ilə cəzalandırıldı. Amma maraqlıdır ki, niyə vurulmayan qol deyil, məhz həkimin cəzası qabardılır? “Araz-Naxçıvan”la oyun çox əhəmiyyətli idi, hətta “qızıl oyun” sayılırdı. Çünki heç-heçə oynasaydıq, böyük ehtimalla çempionluğu təmin edəcəkdik. Həkim hakimə qarşı heç bir təhqiramiz ifadə işlətməyib, sadəcə, deyib ki, “haqsızlıq etdin”. Bütün bunlar gözümün qarşısında olub. Hakim də etiraza görə onu qırmızı vərəqə ilə cəzalandırıb. Həmin vaxt hakim özündə deyildi. Çünki qəbul etdiyi qərarlara görə hər iki komanda tərəfindən haqlı etirazlar çox idi”.

Klub rəsmisi apellyasiya şikayəti edəcəklərini söyləyib:

“5 oyunluq cəza veriblər. Apellyasiya şikayəti edib, cəzanın azaldılmasına çalışacağıq”.

Qeyd edək ki, “Baku Fire” - “Araz-Naxçıvan” görüşü Naxçıvan təmsilçisinin 1:0 hesablı qələbəsi ilə başa çatıb.