“Turan Tovuz”un həkimi Panamada əməliyyat olunan futbolçunun durumunu dəyərləndirib

“Turan Tovuz”un həkimi Mahir Ələsgərov komandanın əsas futbolçularından olan Roderik Millerin durumunu dəyərləndirib.

Mütəxəssis “QELEBE.AZ”a açıqlamasında futbolçunun yaşıl meydanlara nə vaxt qayıdacağını müəyyənləşdirmək üçün təkrar müayinəyə ehtiyac olduğunu bildirib.

O, müayinə prosesinin uzun çəkməyəcəyini deyib:

“Roderik Millerin əməliyyatı yaxşı keçib, hər şey qaydasındadır. Məşqlərə nə vaxt başlayacağı təkrar müayinədən sonra müəyyənləşəcək. Hazırda müayinənin nəticələrini gözləyirik. Bəzi hallarda zədədən sonra dərhal futbolçunun nə zaman meydana qayıda biləcəyini təxmin etmək olur. Millerin durumu elədir ki, mütləq təkrar müayinə lazımdır. Bu da yaxın vaxtlarda həyata keçiriləcək. Futbolçunun durumunu izləyirik, bərpa prosesi keçir. Əməliyyatdan sonrakı görüntülərə baxılandan sonra qərar veriləcək”.

Qeyd edək ki, Roderik Millerə menisk yırtığı diaqnozu qoyulub. O, vətəni Panamada dizindən əməliyyat olunub.