Azərbaycanın minifutbol millisinin baş məşqçisi: “Bakıda xarici komandaların iştirakı ilə turnir keçirmək istəyirik”

Mayın əvvəlində Bakıda xarici komandaların iştirakı ilə minifutbol turniri təşkil etməyi planlaşdırırıq.

Bunu “Report”a açıqlamasında Azərbaycanın minifutbol millisinin baş məşqçisi Elşad Quliyev bildirib.

Mütəxəssis yığma ilə bağlı qarşıdakı planları açıqlayıb:

“Hələ seleksiya prosesi gedir. Martın 5-də Azərbaycan çempionatı başa çatacaq. Martın 10-da isə ilin ilk toplanışına başlamağı planlaşdırırıq. Daha sonra dünya çempionatına hazırlıqla bağlı proqram tərtib ediləcək. İki turnirdə iştirak etməyi planlaşdırırıq. Onlardan biri apreldə Monteneqroda olmalıdır. Həmçinin mayın əvvəlində Bakıda xarici komandaların iştirakı ilə turnir təşkil etməyi planlaşdırırıq”.

E.Quliyev millinin heyətində dəyişikliklər olacağını deyib:

“Heyətlə bağlı dəyişikliklərin olacağı dəqiqdir. Karyerasını bitirənlər, yeni futbolçular var. Bir neçə futbolçu nəzərimizdədir. Əsas odur ki, hansı ölkədə oynamasına baxmayaraq, Azərbaycan vətəndaşı və yaxşı oyunçu olsun. İzlədiyimiz futbolçulardan biri Ramiz Çovdarovdur. O, hazırda Almaniyadadır. Adını çəkmək istəmədiyim bəzi futbolçular da var ki, onların komandaya uyğun olub-olmadığını müəyyənləşdirməyə çalışırıq. Yığmada ən azı 4-5 yeni futbolçu görəcəksiniz”.

Qeyd edək ki, Azərbaycan millisi son olaraq Bosniya və Herseqovinanın paytaxtı Sarayevoda keçirilən Avropa çempionatında çıxış edib. Komanda 1/4 finalda Qazaxıstanla qolsuz bitən oyunun penaltilər seriyasında məğlub olaraq mübarizəni dayandırıb.