Türkiyənin idman mütəxəssisləri Azərbaycana gəliblər

"İdman sahəsində mütəxəssis mübadiləsi proqramı" çərçivəsində Türkiyə nümayəndə heyəti Azərbaycanda səfərdədir.

Bu barədə "Report"a Gənclər və İdman Nazirliyinin mətbuat xidmətindən məlumat verilib.

Nazir Fərid Qayıbov ölkəmizdə səfərdə olan nümayəndə heyətini qəbul edib.

Qonaqlara idman sahəsində görülən işlər, qazanılan uğurlar barədə məlumat verilib. Onlar səmimi qəbula görə təşəkkür edib, ölkəmizdə olduqları müddətdə Bakıda fəaliyyət göstərən bir sıra idman qurğuları ilə tanış olduqlarını bildiriblər.

Görüş zamanı iki qardaş ölkə arasında idman sahəsi üzrə ikitərəfli əlaqələr müzakirə olunub, təcrübə mübadiləsi və digər məsələlər barədə fikir mübadiləsi aparılıb.