“Barselona”nın futbolçusu Çempionlar Liqasında tarixə düşüb

İspaniyanın "Barselona" klubunun braziliyalı hücumçusu Rafinya Çempionlar Liqasında Almaniya təmsilçisi "Bavariya"ya qarşı matçda het-trik edən dördüncü futbolçu kimi tarixə düşüb.

“QELEBE.AZ”un xarici KİV-ə istinadən məlumatına görə, 27 yaşlı hücumçu Çempionlar Liqasının Liqa mərhələsinin III turunda Barselonada keçirilən və meydan sahiblərinin 4:1 hesablı qələbəsi ilə başa çatan oyunda Münhen komandasının qapısına vurulan qollardan üçünün müəllifi olub.

Rafinyadan əvvəl Çempionlar Liqasında "Bavariya"ya qarşı matçlarda Roy Makaay, Serxio Aquero və Kriştianu Ronaldu het-trik etməyi bacarıblar.

Qeyd edək ki, "Barselona" cari mövsüm Çempionlar Liqasında keçirdiyi üç matçda 6 xal toplayıb.