"Turan Tovuz" rəhbərliyi Kurban Berdıyevin qarşısına avrokuboklara vəsiqə qazanmaq hədəfi qoyub

"Turan Tovuz" klubunun rəhbərliyi yeni baş məşqçi Kurban Berdıyevin qarşısına avrokuboklara vəsiqə qazanmaq hədəfi qoyub.

Bu barədə "Report"a Tovuz təmsilçisinin İdarə Heyətinin üzvü Əli Balakişiyev açıqlama verib.

Klubun infrastruktur və maliyyə üzrə direktoru türkmənistanlı mütəxəssisin təyinatı ilə bağlı danışıb: "Uzun müddət idi strategiyamıza uyğun məşqçi axtarışında idik. Gələcəyə hesablanmış layihəmizə uyğun gələn məşqçi kimi Kurban Berdıyevi seçdik. Uzun danışıqlardan sonra razılıq əldə etdik. Kurban Berdıyev haqqında geniş danışmağa ehtiyac yoxdur. Dünyada tanınmış mütəxəssisdir. Təyinatın uğurlu olacağına inanırıq. Təbii ki, hədəfimiz avrokuboklardır".

Klub rəsmisi Tovuz şəhər stadionunda quraşdırılan süni örtüyün FIFA tərəfindən “Quality Pro” sertifikatı ilə təltif olunması məsələsinə də toxunub: "Bildiyiniz kimi, klubumuz bu mövsüm üçün UEFA lisenziyası üçün müraciət etmişdi. Bütün tələbləri yerinə yetirərək lisenziya ala bildik. Tələblərdən biri də süni örtüyün FIFA-nın "Quality Pro" sertifikatına malik olmasıdır. Mayda ali futbol qurumundan nümayəndə gələrək müəyyən laborator analizlər götürüb, testlər keçirmişdi. Sonda laborator analiz və testlərdən uğurla keçən örtüyə FIFA tərəfindən sertifikat verildi. Avrokuboklara vəsiqə qazansaydıq və stadionumuz da üçüncü kateqoriyanı alsaydı, pley-off mərhələsinədək doğma meydanda oynaya bilərdik. Stadionumuzda üçüncü kateqoriya üçün işlər davam edir. Əminliklə deyə bilərəm ki, növbəti mövsüm bu kateqoriyanı alacağıq".

Qeyd edək ki, "Turan Tovuz" klubunun iyunun 18-də Kurban Berdıyevlə müqavilə bağlayacağı planlaşdırılıb.