Azərbaycan qılıncoynadanları Avropa Olimpiya Təsnifat turnirində çıxışlarını başa vurublar

Sablya üzrə Azərbaycan millisinin üzvü Anna Başta və şpaqaçı Ruslan Həsənov Lüksemburqda keçirilən qılıncoynatma üzrə Avropa Olimpiya Təsnifat turnirində çıxışlarını başa vurublar.

"QELEBE.AZ"un məlumatına görə, qrup mərhələsində keçirdiyi beş görüşü qalib başa vuran Anna Başta qadın sablyaçıların şəxsi yarışında ən güclü səkkizliyə yüksəlib.

İdmançı Polşa təmsilçisi Malgorzata Kozaczuk ilə keçirilən qarşılaşmanın gedişatında ciddi zədə aldığından görüşü davam etdirə bilməyib.

Kişi şpaqaçıların şəxsi yarışında qrup mərhələsini 3 qələbə ilə bitirən Ruslan Həsənov pley-offda keçirdiyi ilk görüşdə litvalı Arnas Salokasa 15-9 hesabı ilə qalib gəlsə də, ən güclü səkkizliyə yüksəlmək uğrunda keçirilən qarşılaşmada portuqaliyalı Miguel Frazaoya eyni hesabla məğlub olub.