Könül Əliyeva BƏƏ keçirilən Böyük Dəbilqə turnirində qızıl medal qazanıb

Azərbaycan millisinin üzvü Könül Əliyeva Birləşmiş Ərəb Əmirliklərinin paytaxtı Əbu-Dabidə keçirilən Böyük Dəbilqə turnirinin qalibi olub.

Apasport.az xəbər verir ki, 48 kq çəki dərəcəsində mübarizə aparan cüdoçumuz bütün rəqiblərinə qalib gələrək qızıl medal qazanıb.

Bununla da o, Böyük Dəbilqə turnirində çempionluq qazanan ilk azərbaycanlı qadın cüdoçu kimi tarixə düşüb.

Mübarizəyə 1/8 finaldan başlayan Əliyeva əvvəlcə Özbəkistan təmsilçisi Ulbusin Xakimovanı, 1/4 finalda Niderland cüdoçusu Amber Gersyesi, yarımfinalda isə Fransa idmançısı Melani Lequ-Klemanı məğlub edib.

Finalda Türkiyə təmsilçisi Merve Azakla qarşılaşan Könül Əliyeva rəqibindən üstün olaraq fəxri kürsünün ən yüksək pilləsinə qalxıb.

Qeyd edək ki, bu, Könül Əliyevanın böyüklər arasında Dünya Cüdo Turunda qazandığı ilk qızıl medaldır.