Rüstəm Orucovun çəkisini dəyişməsinin səbəbi açıqlanıb

Azərbaycan cüdoçusu Rüstəm Orucovun çəkisini 73 kq-dan 81 kq-a dəyişməsinin səbəbi bəlli olub.

Federasiyanın baş katibi Rəşad Rəsullu "Report"a müsahibəsində bunun idmançının yaşı ilə bağlı olduğunu bildirib.

Onun sözlərinə görə, Rio olimpiadasının gümüş mükafatçısının yaşı artıq 30-u keçib və bu halda çəkini 73 kq-da saxlamaq çox çətindir: "Rüstəmin çəkisini dəyişməsi rəqabətlə əlaqədar deyil. Məgər, 81 kq-da rəqabət aşağıdır ki? Orucov uzun illərdir 73 kq-da çıxış edir. Hazırda onun çəkisi 83 kq-dır. Hər yarışdan öncə nə qədər çəki salır. Bu isə kifayət qədər enerji itkisi deməkdir. Əvvəllər çəkisi maksimum 78-79 kq olurdu. Biri var çəkini 5 kq azaldasan, biri də var 10 kq. Yaş artdıqca, bunu etmək o qədər də asan olmur. Çəkini salandan sonra bərpa prosesi də sürətlə getmir. Bu qədər çəki salmaq onun çıxışına mənfi təsir göstərirdi".

Rəsullu bildirib ki, Orucov özünü 81 kq-da sınamaq istəyir: "Məşqçilər heyəti onunla danışıb. Bizim üçün çox dəyərli idmançıdır. Bu cür titullu və təcrübəli cüdoçunun yığmada qalması bizi çox məmnun etdi. Komandanın kapitanıdır. Orucova 81 kq-da şans veriləcək. Amma özünü doğrulda bilməsə, ondan sonra digər mərhələlər müzakirə olunacaq. Bu il özünü sınayacaq, çox iddialıdır".

Baş katib Rüstəm kimi idmançı ilə rəqabətin Səid Mollayi üçün də yaxşı olacağını vurğulayıb: "Bu çəkidə Elcan Hacıyev, Zelim Tçkayev kimi potensiallı cüdoçularımız da var. Rüstəm kimi idmançının da bu çəkidə mübarizə aparması rəqabəti artıracaq".

Müsahibənin tam mətnini buradan oxuya bilərsiniz.