“Qarabağ”ın sabiq futbolçusu: “Avropa Liqasının ən güclü 8 komandası sırasına düşmək şansları az deyil”

“Qarabağ”ın Avropa Liqasının ən güclü 8 komandası sırasına düşmək şansı az deyil.

Bunu “Report”a açıqlamasında “Qarabağ”ın sabiq futbolçusu Ramiz Məmmədov Azərbaycan çempionunun Almaniya klubu “Bayer 04”ə qarşı keçirəcəyi UEFA Avropa Liqasının 1/8 final mərhələsinin cavab oyunu barədə danışarkən deyib.

55 yaşlı mütəxəssisin fikrincə, leverkuzenlilərin cari mövsümdə uduzmamalarının Ağdam təmsilçisinə psixoliji təsiri olmayacaq: “Qarabağ” elə böyük ustalıq səviyyəsi, qəhrəmanlıq göstərib ki, mərhələni keçməsə belə, futbol aləmində öz sözünü deyib. Bakıdakı qarşılaşma göstərdi ki, “Qarabağ” “Bayer 04”ə qarşı oynaya bilir. İstər qrup mərhələsində, istərsə də 1/8 finalda bu rəqiblə başabaş mübarizə apara bildi. Rəqibin cari mövsüm məğlubedilməz olmasının heç bir psixoloji təsiri olmayacaq. Məncə, Qurban Qurbanov öz xarakterini futbolçulara aşılayacaq. “Braqa”nı 10 nəfərlə keçə biliriksə, “Bayer 04”ü də məğlub edə bilərik. Sadəcə, inanmaq və oynamaq lazımdır”.

Bu gün “BayArena”da keçiriləcək “Bayer 04” – “Qarabağ” oyunu Bakı vaxtı ilə saat 00:00-da başlayacaq. Bakıdakı ilk matç 2:2 hesabı ilə yekunlaşıb.

Qeyd edək ki, Ramiz Məmmədov 1989-1990 və 1997-ci illərdə "Qarabağ"ın formasını geyinib. O, hazırda I Liqa komandası "Şamaxı"nın baş məşqçisidir.