Mario Balotellinin yeni klubu bəlli olub

Türkiyənin "Adana Demirspor" klubunda çıxış edən Mario Balotellinin yeni klubu müəyyənləşib.

"Report" xəbər verir ki, bu barədə italiyalı insayder Fabritsio Romano özünün sosial şəbəkə hesabında paylaşım edib.

Onun sözlərinə görə, 32 yaşlı hücumçu İsveçrənin "Sion" klubuna keçməyə qərar verib. İtaliya yığmasının sabiq forvardının bu gün yeni klubunda tibbi müayinədən keçəcəyi gözlənilir.

Qalmaqallı oyunçu Superliqada IV turun "Umraniyespor"a 1:0 hesabı ilə qalib gəldikləri görüşündən sonra "Adana Demirspor"un baş məşqçisi Vinçentso Montellanın qəzəbinə tuş gəlib. Final fitinin ardından əsəbi formada meydana daxil olan Montella Balotellinin üzərinə yeriyib. Təcrübəli forvardla baş məşqçini araya girən rəsmi şəxslər və digər oyunçular sakitləşdiriblər.

Mətbuat konfransında isə Montella bildirib ki, Balotelli gözlənilən oyunu sərgiləməyib: "Matçın sonlarında belə gərginliklər ola bilər. Başqa bir şərh əlavə etməyəcəyəm".

Qeyd edək ki, Mario Balotelli 2021-ci ildən "Adana Demirspor"un formasını geyinir.