"Qəbələ"nin qapıçısı: "Nəticələr zamanla düzələcək"

"Nəticələr zamanla düzələcək".

Bunu "Report"a açıqlamasında "Qəbələ"nin qapıçısı Rəşad Əzizli komandasının Azərbaycan Premyer Liqasının I dövrəsindən sonra 7 xalla 9-cu pillədə yer alması ilə bağlı danışarkən deyib.

29 yaşlı qolkiper hazırda kollektivdə hər şeyin yaxşı olduğunu bildirib: "Konfrans Liqasında "Omoniya"ya məğlubiyyət, bir gün sonra uzun yol qət edib çempionat matçına yorğun çıxıb məğlub olmaq komandanı psixoloji cəhətdən çətinə saldı. Toparlanmaq bir az vaxt aldı. Artıq bəlli oyun planımız var. Rəqiblərə qarşı dominant futbol oynaya bilərik və ikinci dövrəyə də yaxşı start verəcəyik".

Əzizli IX turda "Səbail"ə 0:1 hesabı ilə uduzduqları qarşılaşma haqqında da danışıb: "Görüş ərzində tam üstünlük komandamızda idi. Hətta rəqib də bizdən çəkinirdi. Sadəcə, bəxtsizlik oldu və son saniyələrdə qol buraxdıq. Bu matç haqqında əlavə nəsə deməyə ehtiyac yoxdur".