Vitali Borisov: “Qarşımıza qoyulan tapşırıq dünya çempionatına vəsiqə qazanmaqdır”

“Qarşımıza qoyulan tapşırıq dünya çempionatına vəsiqə qazanmaqdır”.

“QELEBE.AZ”un məlumatına görə, bunu Azərbaycan futzal millisinin baş məşqçisi Vitali Borisov Qazaxıstana 2:4 hesabı ilə məğlub olduqları DÇ-2024-ün elit mərhələ oyunundan sonra mətbuat konfransında deyib.

Gənc mütəxəssis qarşılaşmanın gərgin mübarizə şəraitində keçdiyini bildirib: “Belə alınacağını da gözləyirdik. Qazaxıstan çox dinamik komandadır. Komandamız vuruşdu. Hakimlərin bəzi qərarları mübahisəli idi. Buraxılan 3-cü qolun epizoduna baxdım. Məncə, həmin anda hakimin qərarı doğru deyildi. Düzdür, ikinci hissə rəqibin üstünlüyü ilə keçdi. Qapıçıları çox irəli çıxırdı. O isə ayaqla bəzi meydan oyunçularından yaxşı oynayır”.

O, rəqibin ən böyük üstünlüyünün qapıçının irəlidə oynaması olduğunu söyləyib: “Bütün oyunu rəqibin 5 oyunçusuna qarşı keçirmək çətindir. İstər-istəməz zərbələrin sayı çox olur. Taktiki baxımdan fərqli komandadır. Bizdə isə bəzi oyunçular 2-3 gün əvvəl heyətə qoşulublar. Qazaxıstanda isə 6 nəfər eyni klubda çıxış edir və 11 futzalçı ölkə çempionatında mübarizə aparır”.

Baş məşqçi cavab qarşılaşmasının daha çətin olacağını düşünür: “Bu gün Filipinyonu itirdik. Bu böyük itkidir. Orada çətin olacaq. Qazaxıstanda futzalı çox sevirlər. Azarkeşlər zalı dolduracaqlar. Buna baxmayaraq, meydana qələbə qazanmaq üçün çıxacağıq”.