Koşiki-do karate üzrə Azərbaycan millisinin baş məşqçisi: "Uğurlu nəticəyə imza atmışıq"

"Uğurlu nəticəyə imza atmışıq"

"QELEBE.AZ"un məlumatına görə, bunu Yaponiyanın Okinava şəhərindəki beynəlxalq turnirdə medallar qazanmış koşiki-do karate üzrə Azərbaycan millisinin baş məşqçisi Nazim Mövsümzadə Bakıda qarşılanma zamanı jurnalistlərə açıqlamasında deyib.

Mütəxəssis həmin yarışda 15 ölkənin iştirak etdiyini bildirib: "Turnirdə bacarığımızı göstərməyə çalışdıq və komanda hesabında birinci yeri tutduq. Gənclər çox əziyyət çəkmişdilər və yarışda öz sözlərini dedilər. Həmişə çalışmışıq ki, onlar üçün nümunə olaq. Federasiyanın fəxri prezidenti Adnan Əhmədzadəyə və qurumun prezidenti Rafael Bünyatova təşəkkür edirəm. Bizə çox dəstək oldular və hərtərəfli köməklik göstərdilər. Cənab Prezident İlham Əliyevin dediyi kimi dəmir yumruq öz fəaliyyətini göstərir. Yaşasın Azərbaycan!"

50 kq çəki dərəcəsində Sevinc Mövsümzadə turnirdə iştiraka şərait yaratdığı üçün federasiya rəhbərliyinə təşəkkür edib: "Avstraliya, Yaponiya və Yeni Zelandiya idmançılarını üstələmişdim. Atam Nazim Mövsümzadə qızıl medal qazananda isə daha çox sevinirdim".

60 kq-da yarışan Kənan İsmayılzadə ilk və final görüşlərinin çətin keçdiyini söyləyib: "Ardıcıl olaraq Avstraliya, Yeni Zelandiya və yenidən Avstraliya təmsilçisinə qalib gəldim. Qızıl medal qazandığım və bayrağımızı dalğalandırdığım üçün sevincliyəm. Birinci beynəlxalq yarışım olduğu üçün çox həyəcanlı idim. Amma yaxşı hazırlaşmışdıq və belə nəticə qazanacağımızı gözləyirdik".

Qeyd edək ki, iyulun 22-23-də keçirilən beynəlxalq turnirdə Azərbaycan yığması kata və kumitedə, eyni zamanda, veteranlar arasında yarışda çıxış edib. Katada 18-19 yaş kateqoriyasında qızlar arasında ikinci dan qara kəmər sahibi Sevinc Mövsümzadə (50 kq), +40 yaş kateqoriyasında veteranlar arasında altıncı dan qara kəmər sahibi, həmçinin, millinin baş məşqçisi Nazim Mövsümzadə qızıl, 16-17 yaş kateqoriyasında oğlanlar arasında Kənan İsmayılzadə (60 kq) gümüş medal qazanıblar. Hər üç idmançı şəxsi kumitedə də birinci yeri tutub. Azərbaycan yığması turniri ümumilikdə 5 qızıl, 1 gümüş medalla tamamlayıb.

Adıçəkilən idmançılar turnir ərəfəsində Ümumdünya Koşiki Karate-do Federasiyasının (WKKF) rəhbəri, 10-cu dan qara kəmər sahibi professor Massayuki Kukan Xisataka tərəfindən təşkil olunmuş beynəlxalq seminarda da iştirak edərək, müvafiq ustalıq dərəcələrinə layiq görülüb və uyğun sertifikatlarla təltif olunublar.