Məhəmməd Abdullayev Avropa Oyunlarında yarımfinala yüksəlib – YENİLƏNİB-3

Azərbaycan boksçusu Məhəmməd Abdullayev (+92 kq) Polşada keçirilən III Avropa Oyunlarında növbəti döyüşünə çıxıb.

"Report"un yarışlara ezam olunmuş əməkdaşının məlumatına görə, dünya çempionatının mükafatçısı 1/4 finalda Stilianos Pouliasla (Yunanıstan) üz-üzə gəlib.

Görüş boksçumuzun qələbəsi ilə başa çatıb.

Abdullayev rəqibini 5:0 (30:27, 30:27, 30:27, 30:27, 30:27) hesabı ilə məğlub edib.

O, yarımfinala çıxmaqla özü üçün ən azı bürünc medalı təmin edib. Məhəmməddən öncə Murad Allahverdiyev (80 kq) də 1/4 final döyüşünü qələbə ilə bitirib.

Qeyd edək ki, Avropa Oyunlarında yarımfinal döyüşləri iyunun 30-da olacaq.

Azərbaycan boksçusu Sərxan Əliyev (71 kq) Polşada keçirilən III Avropa Oyunlarında növbəti döyüşünə çıxıb. Dünya çempionatının mükafatçısı 1/4 finalda Makan-Vie Traore (Fransa) ilə qarşılaşıb.

"Report"un yarışlara ezam olunmuş əməkdaşının məlumatına görə, döyüş rəqibin qələbəsi ilə yekunlaşıb.

Fransalı boksçu 3:2 (28:29, 30:27, 30:27, 29:28, 27:30) hesabı ilə qalib gəldiyindən Sərxan yarışda çıxışını bitirib.

Qeyd edək ki, bu gün daha 1 boksçumuz 1/4 final döyüşünə çıxacaq. Məhəmməd Abdullayev (+92 kq) Stilianos Pouliasu (Yunanıstan) sınağa çəkəcək.

Azərbaycanın qadın boksçusu Məhsəti Həmzəyeva-Ağamalıyeva Polşada keçirilən III Avropa Oyunlarında çıxışını başa vurub.

“Report”un məlumatına görə, 57 kq çəki dərəcəsində mübarizə aparan idmançı 1/4 final mərhələsində Fransa təmsilçisi Amina Zidaniyə məğlub olaraq, yarımfinala adlaya bilməyib.

O, hər üç raundda rəqibinə yenilərək, 0:5 (27:30, 27:30, 27:30, 27:30, 27:30) hesabı ilə məğlub olub.

Qeyd edək ki, kişi boksçu Murad Allahverdiyev (80 kq) yarımfinala yüksəlməklə həm medalı təmin edib, həm də Paris-2024 Yay Olimpiya Oyunlarına lisenziya qazanıb.

Azərbaycan boksçusu Murad Allahverdiyev Polşada keçirilən III Avropa Oyunlarının 1/4 final mərhələsində Ermənistan təmsilçisi Hambardzum Hakobyana qalib gəlib.

“Report”un məlumatına görə, 21 yaşlı idmançı yarımfinala yüksəlməklə, ən azı bürünc medalı təmin edib.

M.Allahverdiyev hər 3 raundu xeyrinə bitirərək, 5:0 (30:26, 30:27, 29:28, 30:27, 30:27) hesabı ilə qalib gəlib. Boksçu ilk “dördlüy”ə yüksəldiyi üçün Paris-2024 Yay Olimpiya Oyunlarına da lisenziya qazanıb. Bu, boks üzrə Azərbaycan millisinin Fransada təşkil olunacaq olimpiadaya ilk vəsiqəsidir.

Murad Allahverdiyev yarımfinal döyüşünə iyunun 30-da çıxacaq. Azərbaycan boksçusunun final yolundakı rəqibi xorvatiyalı Qabriel Veoçiç olacaq.