Azərbaycan Premyer Liqası: Şeydayev Mahmudova yaxınlaşıb, Zubir və Benzianın qiyməti azalıb

Azərbaycan Premyer Liqasında çıxış edən bəzi futbolçuların transfer qiymətində dəyişiklik olub.

"QELEBE.AZ"un məlumatına görə, "Transfermarkt" saytının yenilədiyi siyahıya əvvəlkitək Azərbaycan millisinin və "Neftçi"nin kapitanı Emin Mahmudov başçılıq edir. 31 yaşlı yarımmüdafiəçinin dəyəri dəyişməz olaraq qalıb - 1,4 milyon avro.

İkinci pillədə geridə qalan mövsümün sonunda "Qarabağ"ı tərk edən Ramil Şeydayev yer alıb. 27 yaşlı forvardın transfer qiyməti 400 min avro artaraq, 1,2 milyon avroya çatıb. Ağdam klubunun forvardı Musa Qurbanlı, yarımmüdafiəçisi Yassin Benzia və "Sabah"ın Ukraynanın "Şaxtyor" (Donetsk) klubundan icarəyə götürdüyü Aleksey Kaşuk 3-5-ci yerləri bölüşdürür - 1 milyon avro.

"Qarabağ"a gələnədək qiməti 1,5 milyon avro olan Benzia geriləsə də, yuxarı sıralardakı mövqeyini qoruyub. Qurbanlının qiyməti 400 min, Kaşukun transfer dəyəri isə 300 min avro artıb.

"Köhlən atlar"dan Leandro Andrade və "Sabah"dan Coy-Lens Mikels (hər ikisi 900 min avro) 6-7-ci yerlərdə qərarlaşıb. Yeri gəlmişkən, siyahıda ən çox artıma nail olan oyunçu Andradedir - 450 min avro. Mikelsdə isə bu göstərici 200 min avrodur.

"Qarabağ"ın aparıcı yarımmüdafiəçisi Abdullah Zubirin transfer qiyməti 50 min avro azalaraq 750 min avro olub. Əvəzində komanda yoldaşı Elvin Cəfərquliyevin qiyməti 600 min avrodan 750 min avroya yüksəlib.

"Sabah"ın qapıçısı Yusif İmanov da siyahıda böyük irəliləyişə nail olub. Qiyməti 300 min avro artan gənc qolkiper 700 min avroluq transfer dəyəri ilə 12-17-ci yerləri bölüşdürür.