“Neftçi”nin baş məşqçisi: “Hədəf bu mövsüm Azərbaycan Kubokunu, gələn mövsüm çempionluğu qazanmaqdır”

“Hədəf bu mövsüm Azərbaycan Kubokunu, gələn mövsüm çempionluğu qazanmaqdır”.

Bunu “Report”a müsahibəsində “Neftçi”nin baş məşqçisi Laurentsiu Regekampf deyib.

Rumıniyalı mütəxəssis iyunun 3-də “Qəbələ” ilə keçiriləcək Azərbaycan Kubokunun final görüşünün onlar üçün böyük önəm kəsb etdiyini bildirib: “Kuboku qazanmaq istəyirəm. Bu, çox vacib tituldur. “Neftçi” çox güclü və ənənəyə malik klubdur. Biz plana riayət etməliyik. Planın əsas tərəfi güclü heyət qurub qarşıdakı mövsümdə çempionluğu əldə etməkdir”.

O, “Neftçi”nin yeni Müşahidə Şurasının da istəyinin 2023/2024 mövsümündə çempionluq olduğunu vurğulayıb: “Yeni transferlər yalnız titul qazanmaq üçün gəldiklərini bilməlidirlər. Bizim onlara mesajımız açıq olmalıdır. Klubda hazırda yeni Müşahidə Şurası var. Onların gələcək üçün istəklərini bilirəm. Bu mesaj açıq-aydındır. Rəhbərlik növbəti mövsüm çempionluğu qarşıya məqsəd qoyub”.

Laurentsiu Regekampfın müsahibəsinin tam versiyasını buradan oxuya bilərsiniz.