Bolqarıstanlı məşqçi: “Azərbaycan Gimnastika Federasiyası inkişaf səviyyəsinə görə liderlər sırasındadır”

“Azərbaycan Gimnastika Federasiyası (AGF) inkişaf səviyyəsinə görə liderlər sırasındadır”.

“Report” xəbər verir ki, bunu aerobika gimnastikası üzrə bolqarıstanlı beynəlxalq dərəcəli məşqçi Desislava Boquşeva deyib.

Milli Gimnastika Arenasında 2-ci səviyyəyə aid məşqçilik kurslarına rəhbərlik edən Boquşeva məşqçilərin hazırlığı ilə bağlı AGF-in gözəl proqram hazırladığını söyləyib: “Bu proqram 8-10 yaşlı uşaqlarla işləyən məşqçilərin 2-ci səviyyəsi üçün nəzərdə tutulub. Kurslarda iştirak edən 9 mütəxəssis təcrübəsini artırır”.

O bildirib ki, aerobika gimnastikası Azərbaycanda gənc idman növüdür: “7-8 il əvvəl inkişaf etdirilməyə başlayıb. Qısa müddətdə əldə edilən uğurlar göz önündədir. Avropa və dünya çempionatlarında Azərbaycan gimnastları uğurlu nəticələr göstərirlər. Bu da yaradılan şəraitin bəhrəsidir”.

Desislava Boquşeva ikinci dəfədir Azərbaycana səfər etdiyini vurğulayıb: “İlk dəfə beş il əvvəl Beynəlxalq Gimnastika Federasiyasının məşqçilik kursları ilə bağlı dəvət almışdım. Burada olduğuma görə çox şadam”.

Qeyd edək ki, aprelin 12-nə qədər davam edəcək kursların sonunda iştirakçılar nəzəri və təcrübi imtahanlar verəcəklər.