"Sabah"ın sabiq legioneri: "Bakı məni mehriban və hərarətlə qarşıladı"

"Bakı məni mehriban və hərarətlə qarşıladı".

"QELEBE.AZ"un məlumatına görə, bunu qış fasiləsində "Sabah"ı Belarusun "Minsk" klubuna dəyişən qapıçı Aleksandr Neçayev Bakıdakı həyat tərzi barədə "Pressball" nəşrinə müsahibəsində deyib.

29 yaşlı qolkiper bildirib ki, şəhərlə bağlı yalnız müsbət təəssüratları var: "Bir çox ölkələrdə olmuşam. Amma heç yerdə belə mehriban və gülərüz insanlara rast gəlməmişəm. Azərbaycan mentalitetini Belarusla müqayisə etsək, fərq hiss olunur. Yenidən Bakıya uçsam, bu, ən yaxşı dostumu ziyarət etmək kimi olar. Başqa cür deyil. Ən güclü emosiyalarım oradakı insanlarla bağlıdır".

"Sabah"a keçidindən də söz açan belaruslu çərçivə qoruyucusunun sözlərinə görə, Azərbaycandan təklif gələnə qədər karyerasını Türkiyədə davam etdirmək imkanı olub: "Amma həmin vaxtla "Rux"la müqaviləm olduğundan Bosfor və Çanaqqala sahillərinə köçmək baş tutmadı. Daha sonra "Sabah" variantı diqqətimi çəkdi. Təklif gözlənilməz oldu. Çünki artıq "Rux"la yeni müqavilənin şərtlərini razılaşdırmışdıq. Bir neçə günə sözləşmə imzalamalı idim. Qəfildən üfüq Bakı klubu ilə bağlı variant göründü".

Neçayev "Sabah"ın bu mövsüm çempionluq uğrunda mübarizə apardığını söyləyib: "Klubda əla iş şəraiti, yüksək keyfiyyətli infrastruktur var. Ən əsası isə güclü komanda yığılıb. Məşqçilər heyətində futbola müasir baxışı olan güclü mütəxəssislər, komandada təcrübəli oyunçular, eləcə də gənc istedadlar toplaşıb. Heyətdə çoxlu legioner var".

O, Azərbaycan heç vaxt dil və mentalitet problemi yaşamadığını vurğulayıb: "Açığı, karyeramı "Sabah"da davam etdirməyimdə komandaya rusiyalı mütəxəssis Murad Musayevin rəhbərlik etməsi həlledici rol oynadı".

Qeyd edək ki, "Sabah"a 2022-ci ilin yanvarında ölkəsinin "Rux" klubundan keçən Aleksandr Neçayev cari mövsümün ilk yarısında heç bir oyunda iştirak etməyib.