Braziliya millisinin və "Atletiko"nun sabiq futbolçusu karyerasını bitirib

Braziliya millisinin sabiq futbolçusu Joao Miranda peşəkar karyerasını başa vurub.

"Report"un məlumatına görə, bu barədə 39 yaşlı mərkəz müdafiəçisi özünün tviter səhifəsində paylaşım edib.

"Vaxt gəlib çatdı. Mənə dəstək olan hər kəsə xüsusi təşəkkür edirəm. Çox sağ, futbol!", - "sambaçı" yazıb.

Qeyd edək ki, "San-Paulu"nun heyətində üçqat Braziliya çempionu olan Joao Miranda Madrid "Atletiko"su ilə İspaniya La Liqasını, Kral Kubokunu və Superkubokunu, Avropa Liqasını və UEFA Super Kubokunu qazanıb, həmçinin Çempionlar Liqasının finalında oynayıb. Yığma ilə Amerika Kubokunda qələbə sevinci yaşayan veteran futbolçu İtaliyada "İnter"in də formasını geyinib.