"Karvan"ın yeni baş məşqçisi: "Komandanın Premyer Liqada daimi iştirakı üçün əlimizdən gələni edəcəyik"

"Karvan"ın yeni baş məşqçisi Azər Həşimov klubun Premyer Liqada daimi iştirakı üçün əlindən gələni edəcək.

Bunu "Report"a 40 yaşlı mütəxəssis özü bildirib.

O, Yevlax təmsilçisinə təyinatı ilə bağlı danışarkən komandanın hədəflərini açıqlayıb:

"İnşallah, hər şeyin yaxşı olacağına inanıram. Əsas seleksiya işləridir ki, futbolçular keyfiyyətli olsun və komanda Premyer Liqada yaxşı yer tutsun. Transfer çalışmalarını davam etdiririk. Legioner və yerli futbolçuların gəlişi davam edəcək. Amma konket ad çəkə bilmərəm. Çünki hər şeyin peşəkar səviyyədə olması üçün rəsmi məlumatları gözləməliyik".

A.Həşimov klubun sabiq baş məşqçisi, hazırkı vitse-prezidenti Kənan Kərimov tərəfindən dəvət aldığını söyləyib:

"Ona təşəkkürümü bildirirəm ki, mənə bu məsul vəzifəni tapşırdı. Gənc mütəxəssislərə güvənmək olduqca yaxşı haldır. Son illər Azərbaycan futbolunda bunun müsbət nümunələrini görmüşük. Məşqçilik karyeramda nə öyrənmişəmsə, ən yaxşısını etməyə çalışacağam. Marafon uzundur. İnşallah, azarkeşlərin də dəstəyini arxamıza alaraq bu çətin yolda irəliləyəcəyik. Uzun illər sonra komanda Premyer Liqaya vəsiqə qazandı. Komandanı yenidən aşağı dəstəyə göndərməyə haqqımız yoxdur. Yevlaxda futbol sevilir. "Karvan" UEFA Kubokunda ilk dəfə mərhələ adlayaraq Azərbaycanda tarix yazmış komandadır".