Azərbaycanın voleybol hakimi: "Böyüklər arasında dünya çempionatına və olimpiadaya təyinat almaq istəyirəm"

Azərbaycanın beynəlxalq dərəcəli voleybol hakimi Eldar Zülfüqarov böyüklər arasında dünya çempionatına, Millətlər Liqasına və Yay Olimpiya Oyunlarına təyinat almaq istəyir.

Təcrübəli referi bu barədə "Report"a açıqlamasında bildirib.

İyulun 2-də Serbiya və Xorvatiyada start götürəcək 19 yaşadək qızların dünya çempionatının matçlarını idarə edəcək ədalət təmsilçisi bu təyinatın onun üçün gözlənilməz olmadığını bildirib:

"Daha əvvəl böyüklər arasında Avropa çempionatlarının final mərhələsində 6 dəfə hakim kimi iştirak etmişəm. 2023-cü ildə həm qadınlar, həm də kişilər arasında qitə turnirində yer almışam. 19 yaşadək qızların dünya çempionatının oyunlarına təyinat alacağımı gözləyirdim. Hər gün matçlar idarə edəcəyik. Daha mötəbər yarışlarda da iş başında olmaq istəyirəm. Buna dünya çempionatı, Yay Olimpiya Oyunları və Millətlər Liqası daxildir. Çünki daha əvvəl Avropa çempionatlarına qatılmışam".

Qeyd edək ki, 24 ölkə yığmasının mübarizə aparacağı U-19 Avropa çempionatında qalib iyulun 13-də bəlli olacaq.