Faiq Qarayev: "Qızıl Avropa Liqası reytinq baxımından Azərbaycan voleybolu üçün vacib idi"

Qadın voleybolçulardan ibarət Azərbaycan millisinin baş məşqçisi Faiq Qarayev komandanın Qızıl Avropa Liqasında uğursuz çıxışını dəyərləndirib.

Mütəxəssis bu barədə "Report"a açıqlama verib.

O, bəzi aparıcı oyunçuların zədə səbəbindən matçlarda iştirak edə bilmədiyini söyləyib:

"Qızıl Avropa Liqası bizim üçün uğursuz alındı. Bəzi aparıcı oyunçularımız zədə səbəbindən oyunlarda iştirak edə bilmədilər. Bu da bizə ciddi çətinliklər yaratdı. Ayşən Abduləzimova və Marqarita Stepanenko zədəli olduqlarından milliyə kömək edə bilmədilər. Onlar Bakıda komandanın yanında idilər, lakin səhhətləri ilə əlaqədar, həkim icazəsi olmadığına görə məşqlərə qatılmadılar. Anastasiya Bayduk və Anastasiya Mertsalova isə ilk oyunda zədələndilər. Hazırda zədəli oyunçularımızın müalicəsi həkim nəzarəti altında davam edir. Əlbəttə, bu yarış reytinq baxımından vacib idi, biz də daha yaxşı nəticələr əldə etmək istəyirdik. Lakin müəyyən səbəblərdən bunu bacarmadıq".

F.Qarayev növbəti il Bakıda keçiriləcək Avropa çempionatına ciddi hazırlaşacaqlarını söyləyib:

"Qarşıda bizi AVRO-2026 gözləyir. Əsas məqsədimiz odur ki, komanda qitə birinciliyində bütün aparıcı oyunçuları ilə çıxış etsin və uğurlu nəticə qazansın. İnanırıq ki, ölkəmizdə keçiriləcək bu möhtəşəm yarışda uğurla çıxış edəcəyik".

Qeyd edək ki, Azərbaycan millisi Qızıl Avropa Liqasında Macarıstan, Sloveniya, Slovakiya və Rumıniyaya 0:3, Monteneqro və Xorvatiyaya isə 1:3 hesabı ilə uduzub.