Azərbaycan komandalarını UEFA turnirlərinin püşkatma mərasimlərində təmsil edəcək şəxslər müəyyənləşib

Azərbaycan komandalarını UEFA turnirlərinin 2025/2026 mövsümünün püşkatma mərasimlərində təmsil edəcək şəxslər müəyyənləşib.

Bu barədə "Report"a Premyer Liqa klublarının mətbuat xidmətindən məlumat verilib.

UEFA Çempionlar Liqasının II təsnifat mərhələsinin püşkatma mərasiminə "Qarabağ"ın Əməliyyatlar departamentinin rəhbəri Fərid Ağayev və Beynəlxalq Münasibətlər üzrə menecer Vüsal Həsənov qatılacaqlar.

"Sabah"ın baş icraçı direktoru Ramin Həsənov UEFA Avropa Liqasının I təsnifat mərhələsinin püşkatmasında iştirak edəcək.

"Araz-Naxçıvan"ın icraçı direktoru Eldəniz Yusubov, "Zirə"dən isə baş menecer Elman Himayətoğlu UEFA Konfrans Liqasının II təsnifat mərhələsinin püşkatma mərasimində təmsill olunacaqlar.

Qeyd edək ki, tədbirlər İsveçrənin Nyon şəhərində baş tutacaq. UEFA Çempionlar Liqasında və UEFA Konfrans Liqasında II təsnifat mərhələsinin püşkü iyunun 18-də, Avropa Liqasında I təsnifat mərhələsinin püşkü isə iyunun 17-də atılacaq.