Ağasəlim Mircavadov: "Azərbaycan millisinin bugünkü oyunda qələbə qazanması çox vacibdir"

Futbol üzrə Azərbaycan millisi səfərdə Latviya yığmasına qarşı keçirəcəyi yoldaşlıq oyununda qələbə qazanmalıdır.

Bu barədə AFFA-nın Məşqçilər Komitəsinin üzvü Ağasəlim Mircavadov "Report"a açıqlama verib.

O, yığmanın baş məşqçisi Fernandu Santuşun mart ayındakı təlim-məşq toplanışında bir sıra islahatlar apardığını söyləyib:

"Amma indiki halda eksperimentə ehtiyac yoxdur. Əsas heyəti təkmilləşdirmək və oyun taktikasını formalaşdırmaq lazımdır. Artıq sentyabrdan yığmanın rəsmi matçları start götürəcək. Bugünkü oyunda qalibiyyət psixoloji baxımdan millimiz üçün çox vacibdir. Komanda rəqibini məğlub etməli, oyunçular və məşqçilər özlərinə inanmalıdırlar. Yığmaya uğurlar arzulayıram. Qələbə qazanacaqlarına ümid edirəm. Əsas heyətə ən yaxın olan oyunçulara bu gün şans verilməlidir".

A. Mircavadov millinin sonuncu qalibiyyətini 2024-cü ilin iyununda qazanmasına da münasibət bildirib:

"Komandada problemlər var. Amma onlar həll olunmalıdır. Fernandu Santuş məşhur müətəxəssisdir. Portuqaliya millisindən sonra Polşa yığmasında və Türkiyənin "Beşiktaş" klubunda az işləyib. Ona inanmaq lazımdır. Özü də oyunçulara güvənməlidir".

Qeyd edək ki, bu gün Riqadakı "Skonto" stadionunda baş tutacaq Latviya - Azərbaycan oyunu Bakı vaxtı ilə saat 17:00-da start götürəcək.