KİV: “Real” “Arsenal”ın aparıcı müdafiəçisi ilə danışıqlar aparır

İspaniyanın “Real Madrid” klubu artıq bir neçə həftədir ki, İngiltərənin “Arsenal” komandasında çıxış edən fransalı müdafiəçi Vilyam Salibanın çevrəsi ilə danışıqlar aparır.

“Report” xəbər verir ki, bu barədə Fransanın “L'Equipe” nəşri yazıb.

Bildirilib ki, Saliba “kral klubu”nun konkret və prioritet məqsədlərindən biridir. Madrid təmsilçisi futbolçunun irəliləyişini bir neçə mövsümdür diqqətlə izləyir. Razılaşma ya qarşıdakı yayda, ya da gələn il baş tuta bilər. Oyunçunun “topçular”la müqaviləsi 2027-ci ilin yayına qədər nəzərdə tutulub.

Qeyd olunub ki, klub müdafiəçiyə müqavilənin müddətini uzatmağı təklif edib, lakin londonlular futbolçunu burada titul qazanmağın mümkün olduğuna inandırmalıdır.

“Transfermarkt” 24 yaşlı Salibanın transfer dəyərini 80 milyon avro qiymətləndirir.

Xatırladaq ki, martda "Liverpul"un cinah müdafiəçisi Trent Aleksander-Arnoldun "Real Madrid"lə anlaşdığına dair məlumat yayılmışdı.