"Xilasedici" komandası Azərbaycanı "Çağırış Kuboku"nda təmsil edəcək

Kişi voleybolçulardan ibarət "Xilasedici" komandası növbəti mövsüm Azərbaycanı "Çağırış Kuboku"nda təmsil edəcək.

Bu barədə "Report"a klubun meneceri Onat Kurt məlumat verib.

O, rəhbərliyin dəstəyi ilə yarışa yaxşı hazırlaşacaqlarını bildirib:

"Növbəti mövsüm üçün 5 yeni oyunçu ilə müqavilə imzalayacağıq. Transferlər davam edəcək. Növbəti mövsüm, təbii ki, hədəfimiz Azərbaycan Kubokunu qazanmaq və ölkə çempionatını birinci pillədə başa vurmaqdır. Avrokuboklarda isə ilk il çempionluq çətindir. Amma sistemi düzgün qurub, bu yolda yaxşı işlər görmək istəyirik".

Klub rəsmisi "Xilasedici"nin Yüksək Liqada bürünc medal qazanması ilə bağlı danışıb:

"Bu, yeni yaranmış klub üçün, təbii ki, uğur sayılır. Bizim inancımız və istəyimiz birinci yeri tutmaq idi. Amma 7 ay əvvəl yaranan klub üçün çətindir. Bütün dünyada transfer dönəmi dekabr-yanvar aylarında başlayır. Amma biz işlərə oktyabrda start verdik. Ən yaxşısını etdiyimizi düşünürəm. Dekabrda Azərbaycan Kubokuna sahib çıxdıq. Digər kollektivlər 3-4 yeni əcnəbi oyunçu cəlb edib gücləndilər. Mübarizə apardığımız klublar keçmişi olanlar və təcrübəli komandalardır. Məncə, baş məşqçi Cəlil Cəlilov və köməkçiləri ilə yaxşı iş ortaya qoyduq".