Mindən çox veteran reqbiçi idman federasiyalarını məhkəməyə verib

Mindən çox veteran reqbiçi müxtəlif idman federasiyalarınını məhkəməyə veriblər.

"Report" xarici KİV-ə istinadən xəbər verir ki, bu barədə onların maraqlarını təmsil edən hüquq firmalarından biri məlumat yayıb.

Keçmiş idmançıların şikayətinə səbəb oyunlar zamanı zədələndikdən, həmçinin beyin sarsıntısı keçirdikdən sonra səhhətlərində yaranan ciddi problemləridir. Müraciət edənlərin əsasən Parkinson, Motor Neyron Xəstəliyi (MND), xroniki travmatik ensefalopatiya və demensiya da daxil olmaqla, həyatı dəyişdirən bir sıra nevroloji problemlərdən əziyyət çəkənlər olduğu bildirilib.

Qeyd edək ki, idmançılar əsasən Dünya Reqbisi, İngiltərə Reqbi İttifaqı, Uels Reqbi İttifaqı, Reqbi Futbol Liqası və digər qurumlardan şikayətçidirlər. Onlar sağlamlıqlarında yaranan problemlərə görə sözügedən qurumlardan təzminat tələb ediblər.