Azərbaycanın qadın MMA döyüşçüsü: "Rəqibimi boğucu fəndlə təslim olmağa məcbur edəcəyimi bilirdim"

Qarşılaşma zamanı rəqibimi boğucu fəndlə təslim olmağa məcbur edəcəyimi bilirdim.

Bunu "Report"a açıqlamasında Azərbaycanın MMA döyüşçüsü Zümrüd Quliyeva deyib.

ASED təşkilatını və “Simral” klubunu təmsil edən 18 yaşlı idmançı ötən gün Qazaxıstanda keçirilən turnirdə yerli idmançı Rusalina Mulikova ilə gərgin keçən qarşılaşmasını şərh edib:

"Məşqçilərim Simral Məmmədov və Eynulla Səmədovla hər gün məşq keçirdik. Qazaxıstandakı döyüşə hazırlaşarkən hər gün boğucu fənd üzərində işləyirdim. Qarşılaşma zamanı rəqibimi boğucu fəndlə təslim olmağa məcbur edəcəyimi bilirdim. Baxmayaraq ki, döyüşün gedişində rəqib bir anlıq üstünlüyü ələ almışdı. Amma vəziyyət sonradan xeyrimə dəyişdi və şükürlər olsun ki, qələbə qazandım".

Gənc idmançı daha əvvəl güləşə dəvət aldığını bildirib:

"Əvvəl bəzi güləş məşqçiləri məni öz komandalarında görmək istədilər. Bildirdilər ki, məni hazırlaşdırıb yığmanın heyətinə düşməyimə kömək göstərəcəklər. Lakin razılaşmadım. Hətta tanışlarım və bəzi məşqçi-müəllimlərim deyirdilər ki, MMA qadına yaraşmayan idman növüdür, bu idman növündə tanınmaq şansın azdır. Bununla belə, MMA-nı atmadığım üçün heç də peşman deyiləm".

Z.Quliyeva gələcəkdə MMA-da yeni uğurlara imza atacağına inandığını söyləyib:

"Qazaxıstandakı yarış mənim üçün yaxşı başlanğıc oldu. Kifayətlənmək niyyətində deyiləm. Məşqlərimizi Sumqayıt şəhərində yerləşən zalda davam etdiririk. Mənimlə yanaşı, bir neçə idmançı da yarışlara hazırlaşırlar. İnşallah, gələcəyim daha da yaxşı olacaq. Düşünürəm ki, MMA-da qadınlar kişilərdən daha tez tanına və qabağa gedə bilər".

Qeyd edək ki, “Octagon-69” çərçivəsində mübarizə aparan Zümrüd Quliyeva 52,2 kq çəki dərəcəsində Rusalina Mulikovanı ilk raundda məğlub edib.