"Zirə"nin legioneri: "Medalçılar sırasına düşmək çətin, amma mümkündür"

"Medalçılar sırasına düşmək üçün sona qədər mübarizə aparacağıq. Çətin olacaq, amma mümkündür".

Bunu "Report"a açıqlamasında "Zirə"nin futbolçusu Məhəmməd Hamdui cari mövsümdəki hədəfləri barədə danışarkən deyib.

Mərakeş əsilli niderlandlı yarımmüdafiəçi komandasının çıxışının bir qədər qeyri-sabit olduğunu bildirib: "Amma getdikcə oyunumuz yaxşılaşır".

Şəxsi hədəflərindən də söz açan 29 yaşlı vinger daha yaxşı çıxış edib, komandaya köməklik göstərmək istədiyini söyləyib.

O, Azərbaycan Premyer Liqasının XV turunda "Qarabağ"a qarşı keçirəcəkləri matça da toxunub: "Həmişə olduğu kimi, bizi çətin qarşılaşma gözləyir. Öz oyunumuzu oynamalı və onlara çox boş zona verməməliyik. İnanıram ki, yaxşı nəticə əldə edə bilərik".

Qeyd edək ki, "Qarabağ" - "Zirə" görüşü noyabrın 28-də keçiriləcək.