ABF rəsmisi: "FIBA Çempionlar Liqasının pley-in matçının Bakıda keçirilməsi Azərbaycanın basketbol tarixində önəmli hadisə olacaq"

FIBA Çempionlar Liqasının pley-in matçının Bakıda keçirilməsi Azərbaycanın basketbol tarixində önəmli hadisə olacaq.

Bunu “QELEBE.AZ”a açıqlamasında Azərbaycan Basketbol Federasiyasının (ABF) baş katibi Vüqar Əzimov "Aliağa Petkim Spor" və İsrailin "Hapoel Holon" klubları arasında FIBA Çempionlar Liqasının ilk pley-in oyununun Bakıda keçiriləcəyinə münasibət bildirərkən deyib.

O, təşkilatçılıqla bağlı təcrübəyə malik olduqlarını bildirib:

“Türkiyə Basketbol Federasiyası və “Aliağa Petkim Spor” klubu bizə müraciət etdi. Komanda Bakıya yanvarın 5-də gələcək. Təşkilatçılıq baxımından təcrübəmiz var. “Sabah” klubu avrokuboklarda oynayıb. Bu səbəbdən xarici komandanın gəlişi, qidalanması, akkreditasiyası və başqa məsələlərlə bağlı təcrübəyə malikik”.

O, federasiya tərəfindən lazımi işlər görüldüyünü vurğulayıb:

“Bildiyiniz kimi, İsrail və Türkiyə klubları neytral meydanda qarşılaşırlar. “Aliağa Petkim Spor” Azərbaycanda basketbolun inkişaf etdiyini nəzərə alaraq bizə müraciət edib. Komanda ev oyununu Azərbaycanda, səfər matçını isə Macarıstanda keçirəcək. İlk iki oyunda hesab bərabər olarsa, üçüncü görüş yenidən Azərbaycanda keçiriləcək. Bu matç yanvarın 22-də baş tutacaq. Təşkilatçılıqla bağlı heç bir problem olmayacaq. Federasiya tərəfindən lazımi işlər görülür. İstər rəsmi, istər qeyri-rəsmi olaraq klublarla təmasdayıq. Hakimlər, oyuna gələcək nümayəndə bəllidir. Pley-in matçının Bakıda keçirilməsi Azərbaycanın basketbol tarixində önəmli hadisə olacaq. Çünki Çempionlar Liqası FIBA-nın nüfuzlu turnirlərindən biridir. Bütün azarkeşləri yanvarın 7-də, saat 19:00-da Bakı İdman Sarayına dəvət edirəm”.

Qeyd edək ki, FİBA Çempionlar Liqasında yanvarın 7-də Türkiyənin "Aliağa Petkim Spor" və İsrailin "Hapoel Holon" klubları arasında ilk pley-in oyunu Bakıda baş tutacaq. İki görüşə hesab bərabər olarsa, yanvarın 22-də üçüncü oyun da məhz Bakıda baş tutacaq.