Azərbaycan Cüdo Federasiyasının rəsmi saytı təqdim olunub

Azərbaycan Cüdo Federasiyasının (ACF) rəsmi saytının təqdimat mərasimi keçirilib.

"QELEBE.AZ"un məlumatına görə, "Absheron Marriott" hotelində baş tutan tədbirdə ACF-in vitse-prezidenti Elnur Məmmədli, qurumun prezidentinin müşaviri Natiq Bağırov, federasiyanın baş katibi Rəşad Rəsullu və digər qonaqlar iştirak ediblər.

Tədbiri giriş sözü ilə açan R.Rəsullu hər kəsi Beynəlxalq Cüdo Günü münasibətilə təbrik edib. Saytla bağlı məlumat verən baş katib portalın ən müasir standartlara cavab verdiyini bildirib. Onun sözlərinə görə, əsas yenilik saytda Azərbaycan idmançılarının iştirak etdiyi yarışları canlı izləmək üçün bölmənin açılmasıdır.

Həmçinin, portalda beynəlxalq və yerli turnirlərin təqvimi də əks olunub. Bundan başqa, saytda Azərbaycan həqiqətlərini dünyaya çatdıran hiperlinklər, şəffaflığı təmin etmək məqsədilə federasiyanın daxili sənədləri, lisenziyalaşdırma ilə bağlı vacib məlumatlar yerləşdirilib.