"Sumqayıt"ın futbolçusu: Əlimizdən gələnin ən yaxşısını ortaya qoymalıyıq

Əlimizdən gələnin ən yaxşısını ortaya qoymalıyıq.

"Report" xəbər verir ki, bunu "Sumqayıt" klubunun futbolçusu Rövlan Muradov UEFA Konfrans Liqasının II təsnifat mərhələsinin cavab görüşləri çərçivəsində səfərdə Macarıstan təmsilçisi "Fehervar"la oyunöncəsi mətbuat konfransında bildirib.

Yarımmüdafiəçi sabah yaxşı nəticə qazanacaqlarına inandığını bildirib:

"Məğlub olduğumuz oyun keçmişdə qaldı. Əlimizdən gələnin ən yaxşısını ortaya qoymalıyıq. İnanırıq ki, yaxşı nəticə qazana biləcəyik. Baxmayaraq ki, ağır oyun olacaq. Yaxşı nəticə qazanmağa çalışacağıq. İnam qələbənin yarısıdır. Komanda yoldaşlarıma bildirəcəyəm ki, hər kəs bizə inanır. Ümidvaram ki, sabah sevinən tərəf biz olacağıq".

Qeyd edək ki, "Fehervar" - "Sumqayıt" matçı sabah Bakı vaxtı ilə saat 21:00-da baş tutacaq. Sumqayıtda baş tutan ilk görüş rəqibin 2:1 hesablı qələbəsi ilə yekunlaşıb.