Musa Qurbanlı: “Hokkeylə tanış olmaqda özüm də maraqlı idim”

“Hokkeylə tanış olmaqda özüm də maraqlı idim”.

Bunu “Report”a açıqlamasında Azərbaycan millisinin futbolçusu Musa Qurbanlı formasını geyindiyi “Yurqorden” klubunun heyətində hokkey oyununda iştirak etməsi ilə bağlı danışarkən deyib.

21 yaşlı hücumçu bildirib ki, İsveç komandasında hər mövsümün sonunda hokkey oynamaq ənənəsi var: “İsveçdə əsas idman növləri futbol və hokkeydir. Hokkey bu ölkədə çox populyardır. “Yurqorden”in hər mövsüm bitdikdən sonra yığışıb hokkey oynamaq ənənəsi var. Burada futbolçularla yanaşı, məşqçilər, həkimlər, bir sözlə, hamı iştirak edir”.

O, hokkeydəki çətinliklərdən də söhbət açıb: “Düzdür, daha əvvəl buz üstündə konki sürmüşəm. Az da olsa, təcrübəm var idi, ayaqüstə qala bilirdim. Ancaq heç vaxt hokkey oynamamışdım. Həddən artıq çətin idman növüdür. Azərbaycan millisinin düşərgəsindən qayıdan kimi kluba getdim. Çünki məni çağırmışdılar, oynayacağımızı bilirdim. Eyni vaxtda hərəkətdə olmaq, şaybanı idarə etmək, ayaqüstə qalmaq çətindir. Bunun üçün fiziki gücün çox olmalıdır. Bəzi futbolçularımız əvvəllər də hokkey oynayıblar. Ona görə də çox yaxşı çıxış edirdilər. Mən onlarla bacarmazdım, sadəcə, maraq üçün getmişdim”.

M.Qurbanlı AVRO-2024-ün seçmə mərhələsində İsveç (3:0) və Belçika (0:5) ilə keçirilən son oyunlara da münasibət bildirib. Forvard Bakıda İsveç üzərində qələbəni xüsusi vurğulayıb: “İsveçlə görüşdə möhtəşəm qələbə qazandıq. Futbolumuz adına tarixi uğur idi. 10 nəfərlə qalmağımıza baxmayaraq, uşaqlar sona kimi gözəl mübarizə apardılar. Layiqli və parlaq zəfər oldu. Xalqımızı bu qalibiyyətlə sevindirdiyimiz üçün məmnun idik”.

Azərbaycan millisinin üzvü Brüsseldə Belçikaya məğlubiyyəti isə heyətdəki itkilər və Eddi İsrafilovun qırmızı vərəqə alması ilə əlaqələndirib: “İsveçlə oyundan sonra kollektivdə özünəinam artmışdı. Belçika ilə matça da ümidli idik. Ancaq itkilərimiz var idi. Bəhlul Mustafazadə və Ramil Şeydayevin yoxluğunu hiss etdik. Üstəlik, birinci hissədə aldığımız qırımızı vərəqə matçın taleyini kökündən həll etdi. Çünki rəqibimiz ustalıq səviyyəsi yüksək olan, dünya ulduzlarından qurulan komanda idi. Fərdi keyfiyyətləri çox yüksəkdir. Onlara qarşı 10 nəfərlə mübarizə aparmaq çətin oldu. Belə alınmasını heç kim istəməzdi. İsveç üzərində qələbədən sonra Belçikadan da yaxşı nəticə ilə dönməyi arzulayırdıq. Nəticə bizi məyus etdi. Bundan sonra isə üzərimizdə daha çox işləməklə önümüzə baxmağa çalışacağıq”.

Qeyd edək ki, Musa Qurbanlı İsveç və Belçika ilə oyunlara çağırılmasına baxmayaraq, meydana çıxmayıb. Milli yer aldığı F qrupunda 7 xalla 4-cü yeri tutub.