İngiltərəli hakim ikinci dəfə "Qarabağ"ın Bakıdakı oyununu idarə edəcək

"Qarabağ"ın Almaniyanın "Bayer 04" klubuna qarşı keçirəcəyi UEFA Avropa Liqasının qrup mərhələsinin IV turunun oyununu idarə edəcək Kreyq Pouson ikinci dəfə Bakıya gələcək.

"QELEBE.AZ" xəbər verir ki, 44 yaşlı referi ötən mövsüm eyni turnirin qrup mərhələsində "köhlən atlar"ın Yunanıstan "Olimpiakos"u ilə qarşılaşmasında (0:0) ədaləti qoruyub.

Bundan əlavə, ingiltərəli hakim 2017/2018 mövsümündə "Qəbələ"nin evdə Yunanıstanın "Panatinaikos" klubuna 1:2 hesabı ilə uduzduğu Avropa Liqasının III təsnifat mərhələsinin cavab matçına da təyinat almışdı.

2015-ci ildən beynəlxalq qarşılaşmaları idarə edən Kreyq Pouson cari mövsüm İngiltərə Premyer Liqasında 7 oyunda əsas referi olub.

Qeyd edək ki, noyabrın 9-da Tofiq Bəhramov adına Respublika stadionunda reallaşacaq görüş saat 21:45-də başlayacaq.