"Kür"ün həndbolçusu: "Doğma meydanda azda olsa, sözümüzü deyə bildik"

"Doğma meydanda az da olsa, sözümüzü deyə bildik".

"Report"un Mingəçevirə ezam olunmuş əməkdaşı xəbər verir ki, bunu kişi həndbolçulardan ibarət "Kür" komandasının kapitanı Kamil Məmmədzadə Xorvatiyanın "Sesvete" klubuna 24:34 hesabı ilə uduzduqları Avropa Kubokunun cavab oyunu barədə danışarkən deyib.

Oyunçu komandadan çox razı olduqlarını bildirib: "Çünki cəmi iki ay əvvəl yığışmışıq. Bu müddətdə kollektiv bir-birinə uyğunlaşmağa çalışır. Bu rəqiblə ilk görüşü Zaqrebdə keçirdik və məğlub olduq. Bəzi texniki problemlərə görə, səfərə tam heyətlə gedə bilməmişdik".

Məmmədzadə rəqibin uzun müddət avrokuboklarda çıxış etdiyini söyləyib: "Çox yaxşı komandadır. Fikrimcə, iki aylıq hazırlığa əsasən, çox yaxşı nəticə göstərə bildik. Qarşıda bizi Azərbaycan çempionatı gözləyir. Liqada öz sözümüzü deyəcəyik".