“Qarabağ”ın həsrətinə Qurban Qurbanov son qoyub, “Neftçi” iki ildir qələbə qazanmır - STATİSTİKA

Premyer Liqanın IX turunda əzəli rəqiblər “Neftçi” və “Qarabağ” birincilərin meydanında üz-üzə gələcəklər.

“Report”un məlumatına görə, bu, komandaların ölkə çempionatları tarixində 92-ci qarşılaşması olacaq.

Bütün mövsümlərin iştirakçıları olan tərəflərin indiyəqədərki duelində Ağdam təmsilçisi üstünlük təşkil edir. Geridə qalan 91 matçın 37-də qələbə qazanan “Qarabağ” 23 dəfə meydanı məğlub tərk edib. 31 qarşılaşmada isə “sülh” qeydə alınıb. Bakılıların qələbəsinin biri texniki nəticə ilə olub.

Vurulan topların sayında da ciddi fərq var. 1992-ci ildə başlanan rəqabətdə “Qarabağ”ın 116 qoluna “Neftçi” 83 topla qarşılıq verə bilib.

Rəqiblər çempionat çərçivəsində “Neftçi”nin meydanında indiyə qədər 45 dəfə üz-üzə gəliblər. Maraqlıdır ki, “Qarabağ” ilk vaxtlar uzun müddət rəqibin meydanında qələbə üzünə həsrət qalıb. Ağdamlıların birinci səfər qalibiyyəti 2009-cu ilə təsadüf edib. Bu, Qurban Qurbanovun “köhlən atlar”ın “sükanı arxası”nda ilk mövsümü olub. Həmin vaxta qədər “Neftçi”nin meydanında baş tutan 16 matçda ev sahibləri yenilgi üzü görməyiblər – 6 qələbə, 10 heç-heçə.

Qurban Qurbanovun gəlişindən sonra “Qarabağ” təkcə ev yox, səfər qarşılaşmalarında da “Neftçi” üzərində ciddi üstünlüyə nail olub. Ağdamlılar bu rəqib önündə bütün səfər qalibiyyətlərini məhz Qurbanovun rəhbərliyi altında qazanıb.

Ümumiyyətlə, “Neftçi”nin rəqibini qəbul etdiyi görüşlərin 13-də ev sahibləri, 16-da qonaqlar 3 xal sevinci yaşayıblarsa, 16 duel bərabərliklə nəticələnib. “Ağ-qaralar” 2001-ci ildəki bir qarşılaşmada texniki qələbəyə seviniblər.

“Neftçi” əsas rəqibini axırıncı dəfə 2021-ci ilin mayında məğlub edib. Son iki ildə təşkil olunan 8 Azərbaycan derbisində “Qarabağ” 7 qələbə, 1 heç-heçəlik nəticə göstərib. Bakılılar son 7 məğlubiyyətin 4-nü doğma arenalarında alıblar.

Bu komandaların görüşlərində indiyə qədər 8 dəfə böyükhesablı nəticə qeydə alınıb. 2001-ci ildəki texniki nəticəni nəzərə almasaq, “Neftçi” yeganə böyükhesablı qalibiyyətini 2000-ci ildə əldə edib – 4:0. Bu isə səfər qarşılaşmasına təsadüf edib.

“Qarabağ” isə 7 dəfə üç və daha çox top fərqilə rəqibini üstələyib. Ağdamlılar iki dəfə 3:0, iki dəfə 4:1, iki dəfə isə 4:0 hesablı qələbə qazanıb. Tərəflər arasında ən böyük fərq 2020-ci ildəki qarşılaşmaya təsadüf edib. “Qarabağ” həmin vaxt “Neftçi”nin meydanında rəqibin qapısından 6 cavabsız top keçirib.

Qeyd edək ki, oktyabrın 8-də “Neftçi Arena”da keçiriləcək “Neftçi” – “Qarabağ” oyunu saat 19:30-da başlayacaq.