İsveç yığması AVRO-2024-ə vəsiqə qazanmasa, baş məşqçi ilə yollar ayrılacaq

AVRO-2024-ün seçmə mərhələsində Azərbaycan millisi ilə eyni qrupda yer alan İsveç yığması final mərhələsinə vəsiqə qazana bilməsə, baş məşqçi Yanne Anderssonla yollar ayrılacaq.

“Report” xəbər verir ki, bunu 61 yaşlı mütəxəssis yerli mətbuata açıqlamasında bildirib.

Onun sözlərinə görə, İsveç Futbol Assosiasiyasının rəsmiləri ilə bu yaxınlarda görüş keçirilib. Qurum rəhbərliyi qərara alıb ki, komanda Almaniyada baş tutacaq Avropa çempionatına vəsiqə əldə etməsə, Andersson postunda qalmayacaq: “Sevinirəm ki, bu məsələyə aydınlıq gəldi. İndi hər kəs hansı şərtlərdə nələrin tətbiq olunacağını bilir. Şansımız az görünsə də, ümidimi itirmirəm”.

Qeyd edək ki, F qrupunda yer alan İsveç yığması 6 xalla turnir cədvəlinin 3-cü pilləsində qərarlaşır. Belçika və Avstriyanın hesabında isə 13 xal var. İsveçlilər qrupda son üç oyunlarını Belçika (16 oktyabr), Azərbaycan (16 noyabr) və Estoniyaya (19 noyabr) qarşı keçirəcəklər.