Azərbaycan millisinin baş məşqçisi: "Dünyanın sonu deyil, növbəti oyunlarda nəticə qazanmaq istəyirik"

"Bu məğlubiyyət dünyanın sonu deyil. Qarşılaşmanı təhlil edəcəyik. Növbəti görüşlərdə keyfiyyətli oyun nümayiş etdirmək və nəticə qazanmaq istəyirik".

Bunu "QELEBE.AZ"a açıqlamasında 21 yaşadək futbolçulardan ibarət Azərbaycan millisinin baş məşqçisi Samir Əliyev Serbiyaya 0:2 hesabı ilə uduzduqları Avropa çempionatının seçmə mərhələsinin matçı ilə bağlı danışarkən deyib.

44 yaşlı mütəxəssis səviyyəli və güclü rəqibə qarşı çıxış etdiklərini bildirib: "Serbiya reytinqdə də bizdən öndə olan kollektivdir. Buna baxmayaraq, oyunçularımız meydanda sona qədər mübarizə apardılar. Futbolda qalibiyyət kimi, məğlubiyyətlər də var. Mübarizə aparıb uduza da bilərsən. Biri də var ki, əllərini yana salırsan və rəqib səni "sürüyür".

Baş məşqçi görüşdə iki fərqli hissənin olduğunu diqqətə çatdırıb: "İlk dəqiqələrdə rəqibin sürətli oyununa görə çətinlik çəkdik. Buna baxmayaraq, serblərin oyundan qol vəziyyəti olmadı. Hər ikisini standart vəziyyətlərdən buraxdıq. Birində standart vəziyyətdən sonra başla fərqləndilər, digərində isə topu uzaqlaşdıra bilmədik, fərdi səhv və təcrübəsizliyin qurbanı olduq. Hər iki qolu da mərkəz müdafiəçisi vurdu. İkinci yarıda daha fəal oynadıq. Görüşün startında isə futbolçularda həyəcan hiss edilirdi. Bu da normaldır. U-21-dəki oyunçuların əksəriyyətinin Premyer Liqa təcrübəsi yoxdur. Bir çoxu Əvəzidicilər Liqasında çıxış edir. I Liqada olanlar da var və həmin yarış yeni başlayıb. Bunları bəhanə kimi demirəm və nəticəyə don geyindirmirəm. Uduzmuşuqsa, buna görə cavabdeh də mənəm. Amma döyüşərək məğlub olduğumuzu qeyd etməliyik. Çox olmasa da, hücumlara çıxırdıq. Rəqib isə həqiqətən güclü kollektiv idi. Birinci hissədə bütün komponentlərdə onlara uduzurduq".

Əliyev Azərbaycan Premyer Liqasında 21 yaşlı futbolçularla bağlı limitin aradan qaldırıldığını xatırladıb: "Daha əvvəl ən azı bir futbolçu meydana çıxırdısa, digəri ehtiyatda qalırdı. İndi isə çətinlik çəkirik. Çünki biz Premyer Liqanı yox, I Liqa və əvəzedicilərin turnirinə baxacağıq. Premyer Liqada 3-4 futbolçumuz var. Yaxşı və ya pis oynasalar da, istər-istəməz dəvət edirik. Oyunçu sarıdan korluq çəkirik, amma yenə vurğulamaq istəyirəm ki, bu, bəhanə deyil. Ustalıq səviyyəsi yüksək olan futbolçularımız olmasa da, ürəyi olan və meydanda canını qoyan oyunçularımız var".

Mütəxəssis sonda qrupdakı növbəti görüşlərdə xallar qazanmaq istədiklərini diqqətə çatdırıb: "Bu rəqiblə evdə də oyunumuz olacaq. Qrupumuz asan deyil. Qarşımıza qoyulan məqsəd hər matçda yaxşı nəticə qazanmaqdır. Bundan əlavə, 3-4 futbolçunu əsas komandaya göndərə bilsək, bu da nailiyyətdir. Artıq Emil Səfərov və Yusif İmanov əsas millidədirlər. Amma Serbiyanın U-21 komandasının heyətində əsas yığmada çıxış edənlər var. Bu da onu deməyə əsas verir ki, rəqib də qələbə qazanmaq istəyirdi. Oktyabrda reallaşacaq Şimali İrlandiya və Lüksemburqla ev qarşılaşmalarında məqsəd maksimum xal toplamaqdır".