Bakıda çempion olan atıcı: “Narazılıq ediləsi heç bir söz, problem yoxdur”

“Narazılıq ediləsi heç bir söz, problem yoxdur”.

“QELEBE.AZ”un məlumatına görə, bunu Bakıda təşkil edilən dünya çempionatında qadınlar arasında 300 metr məsafəyə tüfəngdən üç mövqedə atəşaçma növündə qızıl medal qazanan Norveç atleti Katrin Lunda deyib.

Yarışın təşkilatçılığından razı qalan 29 yaşlı atıcı Bakı küləyinin mundiala əyləncə qatdığını bildirib: “Yarışda hər şey yüksək səviyyədə təşkil olunub. Hər şey mükəmməldir. Burada bizə çətinlik yaradan tək məsələ küləkdir. Amma o da yarışa əlavə rəng, əyləncə qatır. Bakının isti havasını çox sevdik. Şəhəri bu dəfə gəzməyə vaxtım olmadı. Amma çimərliyə getməyə fürsət tapa bildim. Bakıya ilk gəlişim deyil. Əvvəlki səfərlərimdə şəhəri çox gəzmişəm”.

K.Lunda 300 metr məsafəyə atəş açmağın çətin olduğunu söyləyib: “Ötən ildən bu yarışa hazırlaşırıq. Bu kateqoriyada 3 mövqe var. Hər dəfə mövqeyimizi dəyişib hədəfə atəş açırıq. Bu, mübarizəni həm maraqlı edir, həm də çətinləşdirir. Norveçdə 200-300 metr məsafəyə atışlar daha populyardır. Minlərlə insan bu növlə məşğul olur. Mən də bu səbəbdən 300 metr məsafəyə atəşaçmanı seçdim. Bu, digər Avropa ölkələrinə də aiddir. Məhz belə məsafəyə atış üçün poliqonlarımız üstünlük təşkil edir. Atıcıların bu növdə uğur qazanmalarının əsas səbəbi budur”.

Qeyd edək ki, Katrin Lunda 581 xal toplayaraq, birinci yeri tutub.