“Neftçi”nin futbolçusu: “Qələbə qazanmaq üçün əlimizdən gələni edəcəyik”

“Qələbə qazanmaq üçün əlimizdən gələni edəcəyik”.

“QELEBE.AZ”un məlumatına görə, bunu “Neftçi”nin futbolçusu Yuri Matias Türkiyənin “Beşiktaş” klubuna qarşı keçiriləcək UEFA Konfrans Liqasının III təsnifat mərhələsinin cavab oyunu ərəfəsində mətbuat konfransında deyib.

28 yaşlı braziliyalı müdafiəçi “Beşiktaş” stadionunda baş tutacaq qarşılaşmada güclü rəqiblə layiqli mübarizə aparmaq istədiklərini söyləyib: “Beşiktaş” çox güclü komandadır. Amma bizə xoşdur ki, bu cür rəqiblə qarşılaşacağıq. Futbolda hər şey mümkündür. İlk görüşdə buraxdığımız qollar ümumi komandanın səhvlərindən oldu. Unutmayaq ki, ikinci hissədə çox sayda təhlükəli epizodlarımız oldu. Buraxdığımız qollar matçın nəticəsini həll etdi. Səhvlər etdiyimizi bilirik. Sabah bunu təkrarlamamağa və səhvsiz oynamağa çalışacağıq”.

Qeyd edək ki, avqustun 17-də keçiriləcək oyun Bakı vaxtı ilə saat 21:00-da start götürəcək.