“Rakuv”un müdafiəçisi “Qarabağ”la oyununu buraxacaq

Polşanın “Rakuv” klubunun futbolçusu Milan Rundiç UEFA Çempionlar Liqasının II təsnifat mərhələsinin “Qarabağ”la ilk oyununu buraxacaq.

“Report” xəbər verir ki, bunu Çenstoxova təmsilçisinin baş məşqçisi David Şvarqa deyib.

O bildirib ki, serbiyalı mərkəz müdafiəçisi hazırda zədədən əziyyət çəkir. Bu səbəbdən 31 yaşlı oyunçu “Miejski” stadionundakı qarşılaşmada iştirak edə bilməyəcək.

Qeyd edək ki, iyulun 26-da keçiriləcək “Rakuv” – “Qarabağ” görüşü Bakı vaxtı ilə saat 22:15-də start götürəcək.