Heydər Əliyevin 100 illiyinə həsr olunmuş beşnövçülük çempionatı keçirilib

İyulun 3-7-də Fövqəladə Hallar Nazirliyinin İdman-sağlamlıq klubunun təşkilatçılığı ilə Qəbələ rayonunda ulu öndər Heydər Əliyevin 100 illiyinə həsr olunmuş FHN-in qurumları arasında beşnövçülük üzrə çempionata yekun vurulub.

FHN-dən APA-ya verilən məlumata görə, çempionatda FHN-in Aparatı və qurumlarının ümumilikdə 19 komandadan 100-ə yaxın əməkdaşı iştirak edib.

Keçirilən çempionatda iştirakçılar gimnastik hərəkətlər üzrə güc çalışmaları, maneələr zolağı, atıcılıq, üzgüçülük və dağa dırmanma mərhələləri üzrə bacarıqlarını nümayiş etdiriblər.

Yarışın son günündə isə komanda və şəxsi hesab üzrə qaliblər müəyyən olunub.

Dövlət himninin səsləndirilməsi ilə başlanan mükafatlandırma mərasimində çıxış edən FHN-in İdman-sağlamlıq klubunun rəisi polkovnik Füzuli Musayev iştirakçıları təbrik edərək, yarışın əhəmiyyətindən danışıb, idmanın inkişafına göstərilən dövlət qayğısından bəhs edib.

F.Musayev qeyd edib ki, müasir Azərbaycanın əldə etdiyi tarixi nailiyyətlər Heydər Əliyevin adı ilə sarsılmaz tellərlə bağlıdır. Ulu Öndər digər sahələrdə olduğu kimi, ölkə idmanının inkişaf strategiyasını da müəyyənləşdirib və bu istiqamətdə həyata keçirilən kompleks tədbirlər nəticəsində qısa müddətdə böyük uğurlar qazanılıb.

Çıxışında ulu öndər Heydər Əliyevin layiqli davamçısı Prezident, Müzəffər Ali Baş Komandan cənab İlham Əliyevin ölkəmizin tərəqqisi və xalqımızın rifahı naminə gördüyü mühüm işlərdən bəhs edən F.Musayev, dövlətimizin başçısının həyata keçirdiyi məqsədyönlü tədbirlər nəticəsində Azərbaycanın həm də dünyada idman ölkəsi kimi tanındığını iftixar hissi ilə dilə gətirib.

Yarışda komanda hesabında 1-ci yeri Dövlət Yanğından Mühafizə Xidmətinin, 2-ci yeri Mülkü müdafiə qoşunlarının, 3-cü yeri isə Bakı Regional Mərkəzinin komandası tutub.

Şəxsi nəticələrdə 1-ci yerə Xüsusi Riskli Xilasetmə Xidmətinin əməkdaşı Rəşid Sadıqov, 2-ci yerə Kiçikhəcmli Gəmilərə Nəzarət və Sularda Xilasetmə Dövlət Xidmətinin əməkdaşı Kamran Məlikov, 3-cü yerə isə FHN Akademiyasının kursantı Əli Həsənov sahib olub.

Sonda qaliblərə kubok, medal, diplom və fəxri fərmanlar təqdim olunub.