Minifutbol yığmasının baş məşqçisi: "Ümid edirəm ki, bu qrupdan çıxarıq"

"Ümid edirəm ki, bu qrupdan çıxarıq".

Bunu "QELEBE.AZ"a açıqlamasında minifutbol üzrə Azərbaycan millisinin baş məşqçisi Elşad Quliyev dünya çempionatının püşkatmasını dəyərləndirərkən deyib.

Mütəxəssis bildirib ki, yer aldıqları F qrupunun favoritlərindən biri Misir yığmasıdır: "Rəqiblərimiz normal komandalardır. Misir son Afrika çempionudur. Texniki oyuna üstünlük verir. Çox yaxşı oyunçulara malikdir. Heyətində yığmanın sabiq üzvüləri var. Tunis isə son dünya çempionatına ev sahibliyi edib, zəif komanda deyil. Demək olar ki, Misirlə eyni üslubda çıxış edir. İraqı isə tanımırıq. Amma mundiala vəsiqə qazanıbsa, deməli, yaxşı kollektivdir. Mənə elə gəlir ki, hamısı bizə uyğun rəqiblərdir".

Qeyd edək ki, dünya çempionatı oktyabrın 26-dan noyabrın 4-dək Birləşmiş Ərəb Əmirliklərində təşkil olunacaq.