“Qarabağ”ın ÇL-in III təsnifat mərhələsindəki səbəti və bir potensial rəqibi müəyyənləşib

“Qarabağ”ın 2023/2024 mövsümündə UEFA Çempionlar Liqasının (ÇL) III təsnifat mərhələsində yer alacağı səbət müəyyənləşib.

“QELEBE.AZ”un məlumatına görə, Azərbaycan çempionu turnirin ilk iki raundunda büdrəməsə, növbəti mərhələdə də səpələnmişlərin sırasında olacaq.

Qurban Qurbanovun yetirmələri ÇL-də yollarına davam edəcəkləri təqdirdə, ən azı pley-offa qədər bütün mərhələlərin püşkatmasında güclülərin səbətində qərarlaşacaqlar.

III təsnifat mərhələsindəki bir potensial rəqib də məlumdur. Ağdam klubu ilk iki raundu keçsə, buradakı 6 mümkün rəqibdən biri Yunanıstan təmsilçisi AEK (Afina) olacaq.

Qeyd edək ki, Çempionlar Liqasında iyunun 20-də I, 21-də II təsnifat mərhələsinin, iyulun 24-də isə III raundun püşkü atılacaq.