Bakı sakinləri üçün gimnastika məşğələləri təşkil edilib

Gənclər və İdman Nazirliyinin "İdman hamı üçün" layihəsi çərçivəsində Azərbaycan Gimnastika Federasiyası ilə birgə "Gimnastika hamı üçün" məşğələləri təşkil edilib.

Nazirliyin mətbuat xidmətindən "Report"a verilən məlumata görə, Bakı Konqres Mərkəzinin ərazisində baş tutan tədbirdə çox sayda şəhər sakini iştirak edib.

Tədbirdə müxtəlif musiqili-nümunəvi çıxışlar təqdim edilib. Bütün yaş kateqoriyasından olan insanlar proqrama qoşularaq, gimnastika mütəxəssislərinin rəhbərliyi altında isinmə, gimnastika, rəqs hərəkətlərini yerinə yetiriblər.

Qeyd edək ki, əyləncəli idman tədbirinin keçirilməsində məqsəd əhali arasında gimnastikanın təbliği, idmana marağın artırılması, sağlam həyat tərzinə çağırış və asudə vaxtın səmərəli təşkilidir.