"Turan Tovuz" və legioneri Premyer Liqada ilkə imza atıb

"Turan Tovuz" klubu Azərbaycan Premyer Liqasında ilk böyükhesablı qələbəsini qazanıb.

"Report" xəbər verir ki, bölgə təmsilçisi buna XXXIII turda "Neftçi"ni 4:0 hesabı ilə üstələməklə nail olub.

Tovuz klubu həm də ilk dəfə bir matçda 4 qol vurub. Bu görüşdə 3 qolla yadda qalan Runi Eva “Turan Tovuz”un tarixinə Premyer Liqada ilk het-trikin müəllifi kimi düşüb.

Hücumçu həm də Azərbaycan çempionatları tarixində bir oyunda 3 qol vuran ilk kamerunludur. O, Afrika qitəsindən olan legionerlərin 8-ci het-trikinə imza atıb. Evayadək 6 afrikalı 7 matçda hərəyə üç qol vurub. Əhməd Ticani iki, digərləri bir het-trikə sevinib.

Qeyd edək ki, cari mövsümdə ikinci dəfə bir futbolçu oyunda 3 qol vurub. Runi Evaya qədər buna Emin Mahmudov nail olub. “Neftçi”nin üzvü “Səbail”lə XV turun qarşılaşmasında üç dəfə fərqlənib.