FIFA referisi oyun zamanı futbolçunu dizi ilə vurub

FIFA referisi Fernando Ernandes Qomes Meksika çempionatının XIII turunda keçirilən “Amerika” – “Leon” oyununda qonaq komandanın futbolçusunu dizi ilə vurub.

“Report” xəbər verir ki, hadisə görüşün 65-ci dəqiqəsində baş verib.

“Amerika”nın vurduğu qoldan sonra “Leon”un futbolçuları hakimə etiraz ediblər. Etirazını kəskin şəkildə bildirən Stiven Barreyro sarı vərəqə alıb. Həmin vaxt FIFA referisi digər etirazçı Lukas Romeronu isə qasıq nahiyəsinə diz zərbəsi vurmaqla cəzalandırıb.

Bunun Ernandes Qomesin karyerasında son oyun olacağı ehtimal edilir. Meksika Futbol Federasiyası onun davranışını araşdırmağa başlayıb. Hakimin ömürlük futboldan uzaqlaşdırılması istisna olunmur.

Qeyd edək ki, oyun 2:2 hesabı ilə başa çatıb.