Bədən tərbiyəsi və idman gününə həsr olunmuş stolüstü tennis turniri başa çatıb

Azərbaycan dövlət qurumlarının əməkdaşları arasında 5 mart Bədən tərbiyəsi və idman gününə həsr olunmuş stolüstü tennis turnirinə yekun vurulub.

Federasiyadan "Report"a verilən məlumata görə, “Şüa” İdman Kompleksində təşkil olunan yarışda 44 qurumdan 104 kişi, 43 qadın stolüstü tennis həvəskarı şəxsi mübarizədə bacarığını göstərib.

İki gün davam edən yarışın nəticələrinə əsasən, qadınlar arasında Svetlana Kayumova (SOCAR) baş mükafata layiq görülüb. Rəna Vahabzadə (Mədəniyyət Nazirliyi) ikinci, Leyla Bağırova (Rəqəmsal İnkişaf və Nəqliyyat Nazirliyi) ilə Yeganə Əlizadə (Mərkəzi Ordu İdman Klubu) üçüncü yeri tutub.

Kişilərin turniri Əli Bayramovun (Fövqəladə Hallar Nazirliyi) qələbəsi ilə nəticələnib. Vüqar İbrahimov (Fövqəladə Hallar Nazirliyi) fəxri kürsünün ikinci, Yaşar Mövlamovla (Dövlət Turizm Agentliyi) Fəxrəddin İsmayılov (Dövlət Təhlükəsizliyi Xidməti) üçüncü pilləsinə qalxıb.

Gənclər və İdman Nazirliyi ilə Azərbaycan Stolüstü Tennis Federasiyasının təşkil etdiyi turnirdə fərqlənən iştirakçılar diplom və mükafatlarla təltif olunublar.